Gilugwayan sa Department of Labor and Employment (DOLE) ang gidugayon sa ilang emergency employment program gikan sa 10 ka adlaw ngadto sa 20 ug hangtod 45 ka adlaw aron mas madugangan ang kita ug oportunidad sa mga benepisyaryo.
Sumala sa DOLE, kadaghanan sa mga trabaho nga gipahigayon sa mga benepisyaryo nakasentro sa environmental protection activities ug mga proyekto nga mapuslanon sa komunidad.
Sa miaging semana, kapin sa 2,500 ka mga benepisyaryo ang gitapok sa 253 ka pampublikong eskwelahan sa tibuok Zamboanga Sibugay aron motabang sa Brigada Eskwela isip pagpangandam sa pagbukas sa klase alang sa School Year 2026-2027.
Ang maong kalihokan gipahigayon pinaagi sa pakigtambayayong sa Department of Education aron masiguro ang kahapsay ug kaandam sa mga eskwelahan alang sa bag-ong tuig sa pagtuon.
