Gipasidunggan si NCIP Chairperson Secretary Nancy Catamco sa “Natatanging Pilipina sa Larangan ng Paglilingkod sa Tao at sa Bayan” award, atol sa Duyan Ka ng Magiting Awards 2026 nga gipahigayon niadtong Hunyo 12 niining tuiga didto sa Quezon City. Ang maong pasidungog, gihatag sa mga Pilipino nga nagpakita og ehemplo sa pagpangulo, integridad ug dakong kontribusyon sa nasud ug katawhan.
Sumala ni Secretary Catamco, ang maong pasidungog, dili lamang personal nga kalampusan, kundili, usa usab ka inspirasyon, aron ipadayon ang iyang misyon sa pagpanalipod sa katungod, kaayohan ug dignidad sa Indigenous Cultural Communities ug Indigenous Peoples sa nagkadaiyang bahin sa nasud.
Isip pangulo sa NCIP, padayon niyang gipalambo ang mga programa alang sa pagpanalipod sa mga katungod sa mga lumad, paglig-on sa ilang representasyon ug paghatag og dugang oportunidad sa ilang mga komunidad. Matud pa ni Catamco, magpadayon ang iyang pag-alagad alang sa nasud ug sa mga Katutubong Pilipino, isip pagpasalamat sa pagsalig ug pagpasidungog nga iyang nadawat.
Photo Courtesy: Philippine News Agency
