Makalaum ang mga konsumidor og mas ubos nga bayronon sa elektrisidad karong bulan sa Hunyo human nagpahibalo ang National Grid Corporation of the Philippines (NGCP) niadtong Lunes sa pagkunhod sa ilang transmission rate.
Sumala sa NGCP, ang kinatibuk-ang average transmission rate mikunhod og 9.33%, diin nahimo na lang kini nga ₱1.4492 kada kilowatt-hour (kWh) kung itandi sa ₱1.5983 kada kWh nga natala niadtong bulan sa Abril.
Ang maong pagkunhod nabati sa tulo ka dagkong rehiyon sa nasod apan managlahi ang kantidad niini kada kWh base sa dapit sa mga konsumidor. Ang rehiyon sa Visayas maoy dunay dakong rollback nga miabot og ₱0.2884 kada kWh, gisundan sa Luzon nga adunay ₱0.1481 kada kWh nga pag-ubos, samtang ang Mindanao nakasinati usab og gamay nga uswag nga nagkantidad og ₱0.0140 kada kWh.
Gipasabot sa NGCP nga ang nag-unang hinungdan sa maong rollback mao ang pag-ubos sa gitawag nga wheeling rate, o ang partikular nga bayranan sa paghatod sa kuryente pinaagi sa transmission grid. Ang maong wheeling rate mikunhod og 6.99%, diin gikan sa ₱0.6028 kada kWh niadtong Abril, nahimo na lang kini nga ₱0.5607 kada kWh nga dakong tabang alang sa mga konsumidor karong panahona
Photo Courtesy: Nassau National Cable
