Nisangpot sa kagubot ang gipahigayon nga anti-G7 protest sa Geneva, Switzerland niadtong Hunyo 14, usa ka adlaw sa dili pa pormal nga sugdan ang G7 Summit. Ang malinawon unta nga martsa sa gibanabanang 20,000 ka tawo nga giorganisa sa “No-G7” nga koalisyon napuno sa kagubot sa dihang nisagol ang dul-an 600 ka miyembro sa radikal nga grupong “Black Bloc” ug nagsugod sa pagpamuslo ug pagpangdaot.
Nagbilin og dakong kadaot ang protesta human gipangsunog sa mga raliyista ang usa ka Tesla nga sakyanan ug gipangbuak ang mga bildo sa mga opisina sa United Nations (UN), partikular na ang ITU, ingon man ang mga pribadong bangko ug ang buhatan sa PwC. Isip tubag sa mga pagpanglabay og bato ug pabuto sa mga nagmaskarang batan-on, migamit ang Swiss riot police og tear gas ug water cannons aron pagpatuman sa kahapsay.
Aron mapugngan ang mas dako pang kagubot, adunay pipila ang naaresto ug nakuhaan og mga armas sama sa kutsilyo ug uban pang hinagiban.
Nagpakatag usab ang Switzerland og 4,000 ka militar ug gisirad-an ang mga utlanan padulong sa France. Sumala sa taho, nag-ugat ang kasuko sa mga raliyista tungod sa dili patas nga pagbahin sa bahandi sa kalibutan, mga polisiya ni US President Donald Trump, ug ang padayong giyera nga nakaapekto sa katungod sa mga Palestinian.
Photo courtesy: DW
