Nakapahingangha sa mga doktor ang usa ka lalaki nga si Paul Baxter, human madiskubre nga adunay gamay dulaang plastik nga na-stuck sa iyang baga sulod sa kapin 40 ka tuig.
Sumala sa report, si Baxter nakasinati og siging ubo ug uban pang sintomas, maong nagpacheck-up siya sa ospital. Sa unang tan-aw sa mga doktor, adunay nakita nga kadudahang butang sa iyang baga nga nakahatag og kabalaka sa basin seryoso nga kondisyon.
Apan atol sa procedure aron susihon kini, nakurat ang mga doktor sa ilang nadiskubre ang maong “mass” diay usa ka 1-centimeter nga Playmobil traffic cone toy nga iyang aksidenteng nasimhot niadto pang mga 7-anyos pa siya.
Mas makapatingala pa, ang iyang airway nakahimo og paagi aron maka-adjust ug motubo palibot sa gamayng plastik nga duwaan sulod sa upat ka dekada nga walay nakabantay.
Human matangtang ang dulaan pinaagi sa medikal nga procedure, hingpit nga nawala ang iyang chronic cough ug mibati siya og dakong kausaban sa iyang kahimtang.
Ang maong istorya nagpahinumdom nga talagsaon kaayo ang abilidad sa lawas sa pag-adjust ug paglahutay, apan importante gihapon ang pagpaminaw sa mga sintomas ug pagpacheck-up kon adunay dili normal nga gibati.
Photo Courtesy: x.com
