Giklaro ni Barangay Apo Macote Chairman Vicente Leono nga ang aplikasyon alang sa gitawag nga mountain quarry sa Purok 4, Mahinog kay usa lamang ka “land formulation” o pag-landscape sa yuta aron maandam alang sa livestock raising program sa tag-iya niini.
Matod ni Kapitan Leono, temporaryo pa lamang ang pagtugot nga gihatag sa barangay pinaagi sa usa ka Letter of No Objection aron makaagi pa sa mas lawom nga pagsusi sa mga ahensya sa gobyerno sama sa City Government ug Environmental agencies.
Giingon sa kapitan nga dili kini sama sa naandang quarry operation nga nagkuha ug yuta o bato aron ibalhin sa laing lugar. Hinuon, pagpatag ug pag-ayo lang kini sa mismong yuta sa tag-iya alang sa ilang plano nga pagpamuhi ug mga hayop.
Dugang niya, wala pay nakitang illegal nga pagmina o “mina-mina” sa maong lugar ug preliminaryo pa lamang ang gihimong aksyon sa barangay aron mahatagan kini ug hustong imbestigasyon gikan sa mas taas nga ahensya.
Sa inisyal nga assessment sa barangay, batoon ang maong lugar ug dili kini makadaot sa mga umahan ug agricultural areas sa palibot. Layo usab kini sa mga kabalayan busa walay direktang epekto sa mga residente sa Barangay Apo Macote.
Nagpabilin karon nga ubos sa pakisusi sa mga kinahanglang ahensya ang maong proyekto aron masiguro nga legal ug luwas kini sa komunidad ug kinaiyahan.
Photo Courtesy: Barangay Apo Macote Council
