Mitunol og ₱1.5 milyones nga tabang-pinansyal ang kagamhanang lokal sa Bukidnon, ubos sa pamunuan ni Governor Rogelio Neil Oneil Roque, ngadto sa dakbayan sa General Santos. Kini human giigo sa kusog nga 7.8 magnitude nga linog ang maong syudad niadtong Hunyo 8, 2026, nga dinalian usab nga gipaubos sa state of calamity.
Base sa report niadtong Hunyo 11, moabot na sa 17 ang nakabsan sa kinabuhi, 2 ang missing, ug kapin sa 600 ka tawo ang nangaangol ug nangasamdan tungod sa katalagman. Gawas niini, anaa sa 6,724 ka pamilya ang grabeng naapektuhan ug nanginahanglan karon og dinalian nga tabang.
Personal nga gihatod sa delegasyon sa Bukidnon, nga gipangulohan ni DRRM IV Israel Johan M. Damasco, Jr. ug Board Member Bobby Jay Dinlayan, ang maong tseke. Nakig-alayon gilayon sila kang City DRRM Officer Dr. Agripino V. Dacera, Jr. aron masiguro nga ang ayuda motubag sa aktuwal nga panginahanglanon sa mga biktima.
Kini nga lakang nagpakita sa lig-on nga prinsipyo sa pagtinabangay ni Governor Roque. Gipamatud-an sa Bukidnon nga sa panahon sa kalisod, ang panaghiusa ug tiunay nga kaluoy sa isig ka komunidad mao ang labing kusgan nga pwersa aron daling makabangon ang mga apektadong katawhan
Photo Courtesy: LGU – Bukidnon
