Mokabat na sa 1,067 ka mga suspected probable, ug confirmed cases sa dengue nga natala sa probinsya sa Zamboanga del Sur niining tuig 2026.
Sa monitoring sa Integrated Provincial Health Office (IPHO) Zamboanga del Sur, ang maong gidaghanon sa mga kaso gikan sa unang quarter hangtod sa ikaduhang kwarter niining tuiga.
Matud ni Kurt Bryan Larubis, Nurse-I sa IPHO ZDS, padayon ilang monitoring sa mga lamok nga nagdalag ug dengue aron makahimo dayon ug preventive measure ug malikayan ang dugang pang pagsaka sa mga kaso sa dengue sa nagkalain-laing munisipalidad.
Gipahinumdoman usab ni Larubis ang publiko nga mosunod sa mga lakang batok sa dengue sama sa kanunay nga pagpanglimpyo sa palibot, pagyabo sa sudlanan nga napondohan ug tubig nga mahimong kapuy-an lamok.
Samtang, giawhag usab ni Larubis ang mga ginikanan ug mga residente nga magpakonsulta dayon sa labing duol nga health center o ospital kon adunay mga sintomas sa dengue sama sa taas nga hilanat, labad sa ulo, ug uban pang sintomas.
