Nagpabiling lig-on ang kahimtang sa trabaho sa Zamboanga Peninsula human miabot sa 97.5 porsyento ang employment rate sa rehiyon, sumala sa Department of Labor and Employment (DOLE) Region 9.
Gibutyag ni DOLE-9 Assistant Regional Director Atty. Rossel Jallorina atol sa Kapihan sa Rehiyon Nueve nga kapin 1.6 milyon ka mga residente sa rehiyon ang adunay trabaho base sa pinakabag-ong labor statistics.
Padayon usab ang DOLE-9 sa pagpalig-on sa mga employment program aron mas daghang oportunidad sa trabaho ang mahatag ngadto sa mga residente sa Zamboanga Peninsula.
Lakip niini ang mga job fair nga nagtanyag og liboan ka local ug overseas job vacancies, ingon man ang TUPAD program nga nakahatag og temporaryong trabaho sa liboan ka mga benepisyaryo sa tibuok rehiyon.
Giingon sa DOLE-9 nga ilang ipadayon ang pagpalambo sa mga programa aron dili lamang makahatag og trabaho kondili makaseguro usab og lig-on ug sustenableng panginabuhian alang sa mga mamumuo sa Zamboanga Peninsula.
