Makasinati og gamay nga kahupayan ang mga pasahero sa domestic ug international flights human gipahibalo sa Civil Aeronautics Board (CAB) ang pagpaubos sa passenger fuel surcharge gikan sa Level 13 ngadto sa Level 12.
Sumala sa CAB, ang bag-ong Level 12 fuel surcharge ipatuman gikan Hunyo 16 hangtod Hunyo 30, 2026, kapuli sa miaging Level 13 nga gipatuman gikan Hunyo 1 hangtod Hunyo 15.
Ubos sa Level 12, ang fuel surcharge sa mga domestic flights naglangkob gikan P389 hangtod P1,137, samtang sa international flights, nagkantidad kini gikan P1,284.40 hangtod P9,550.13, depende sa gilay-on sa biyahe ug klase sa serbisyo.
Matod sa ahensya, ang fuel surcharge usa ka dugang nga bayad nga lahi sa base fare sa eroplano, nga gipahamtang aron matabangan ang mga airline sa pagbalanse sa gasto sa jet fuel.
Gilauman sa CAB nga ang maong pagpaubos makatabang sa paghatag og gamay nga kahupayan sa mga pasahero sa tibuok nasud samtang nagpadayon ang pag-usab-usab sa presyo sa gasolina sa aviation sector.
Photo courtesy: GMA
