Nagplano ang Department of Agriculture (DA) nga mogahin og $12.25 milyones nga pondo aron pakusgan ang mga agricultural exports sa nasod ug mapakanaug ang trade deficit o ang gintang tali sa gi-import ug gi-export nga mga produkto.
Matod ni Agriculture Secretary Francisco Tiu Laurel Jr., dako og tabang kini nga lakang aron mosaka ang kita sa mga lokal nga mag-uuma ug makahatag og dugang trabaho, human mitala og record-high nga $1.03 bilyon ang farm exports sa nasod niadtong Abril, nga mas taas og 33.2 porsyento kumpara sa miaging tuig.
Sumala ni DA Spokesperson Arnel de Mesa, ang maong pondo kuhaon gikan sa grant nga gihatag sa World Bank alang sa nasod. Tinguha niini nga mapalambo pag-ayo ang produksyon sa mga lokal nga produkto sama sa mga prutas, lubi, ug uban pang mga high-value crops aron mas makasugakod ug makasabay sa hugot nga kompetisyon sa merkado sa gawas sa nasod.
Pinaagi niining dakong pondo gikan sa World Bank, gilauman nga mas mapadali ang modernisasyon sa sektor sa agrikultura sa tibuok Pilipinas. Ang maong lakang gitan-aw nga magdala og malungtarong kalamboan nga magsiguro nga ang mga lokal nga produkto magpabiling de-kalidad ug competitive sa tibuok kalibotan
Photo Courtesy: Wikipedia
