Nipadayag si Alyssa Valdez ug ang tibuok Alas Pilipinas women’s team nga ang pagserbisyo sa nasod nga walay pagduha-duha mao ang labing maayong pamaagi sa pagsaulog sa Independence Day sa nasod.
Sumala pa ni Valdez, dako kaayo ang ilang garbo nga makarepresentar sa nasod taliwala sa mga saba ug mga isyu nga nanghitabo bisan asa. Bisan pa man og napakyas ang mga Filipina nga makasulod sa semifinals sa AVC Women’s Volleyball Cup human sila mapildi sa Taiwan, dako gihapon ang ilang pasalamat sa ilang gipakita nga performance sa dula.
Gidayeg ang tibuok koponan tungod kay ning salmot ug ning sukol gihapon kini sa dula samtang ang uban nibalibad.
Nakita ni Valdez, kinsa lagmit anaa na sa iyang katapusang mga dula sa nasodnong koponan, ang hayag nga kaugmaon alang sa Alas squad ug nanghinaot nga magpadayon ang mga batan-ong magdudula sa pagpakigbatok alang sa dungog sa nasod.
Photo Courtesy: OneSports
