Nabulabog ang pageant community human mibuto ang kontrobersiya nga nalambigit kang Filipino-American pageant titleholders nga sila Brandon Espiritu ug Jether Palomo tungod sa ilang kontrobersyal nga mga pahayag bahin sa gitawag nilang “halfies.”
Nagsugod ang isyu human mikaylap sa social media ang usa ka video diin si Espiritu ug ubang international pageant delegates gitahasan sa pagkanta sa ilang nasudnong awit. Imbis nga mokanta sa “Lupang Hinirang,” si Espiritu ug Palomo mikanta sa “The Star-Spangled Banner,” ang national anthem sa Estados Unidos. Sa comment section, adunay netizen nga nangutana nganong wala sila mokanta sa Filipino bisan pa man nga nagrepresentar sila sa Pilipinas sa international pageants.
Mitubag si Palomo nga dili sila gikan sa Pilipinas, samtang mas nakadani og kritisismo ang komento ni Espiritu nga nag-ingon “This country wouldn’t have a chance on the national stage without us halfies ” Ang maong pamahayag gisabot sa daghang netizens isip pagpaubos sa mga full-blooded Filipinos nga nagrepresentar sa nasud sa nagkalain-laing international pageants.
Tungod niini, sunod-sunod ang reaksyon gikan sa mga personalidad sa pageantry lakip sila Kirk Bondad, Winwyn Marquez, Gazini Ganados, Cindy Obeñita, Kenneth Marcelino, ug Stacey Gabriel, nga nagpasabot sa ilang suporta sa tanang Pilipino nga nagdala sa bandila sa nasud bisan unsa pa ang ilang kaliwat.
Apan ang labing nakapukaw sa atensyon mao ang komento sa internationally acclaimed Filipino fashion designer nga si Michael Cinco . Sa iyang viral nga pamahayag, iyang gisaway ang duha ka pageant titleholders pinaagi sa pag-ingon “The nerve of these ordinary-looking guys acting superior when they
don’t even look like they have any foreign ancestry… They only come to the Philippines to build a career and gain followers… DUHHH…”
Ang maong komento dali nga mikaylap ug nahimong sentro sa diskusyon sa social media.
Human sa nagkadaghang batikos, parehong nangayo og pasaylo sila Espiritu ug Palomo pinaagi sa ilang social media accounts. Giangkon nila nga dili angay ang ilang mga pamahayag ug ilang gipasabot nga proud gihapon sila sa ilang Filipino heritage ug wala nila tuyoa nga maliiton ang mga Pilipinong nagrepresentar sa nasud.
Bisan pa sa ilang pagpasaylo, padayon gihapon ang diskusyon sa social media mahitungod sa representasyon, nasyonalidad, ug unsay tinuod nga kahulogan sa pagka-Pilipino sa kalibutan sa pageantry.
Photo Courtesy: Instagram/Philippine Pageants
