Giklaro sa aktres ug social media personality nga si Iwa Moto nga usa ang Kapamilya actress nga si Jodi Sta. Maria sa iyang mahimong bridesmaids sa umaabot niyang kasal uban sa iyang longtime partner nga si Pampi Lacson. Sa iyang interview sa programang Fast Talk with Boy Abunda, gipasigarbo ni Iwa ang kalig-on sa ilang relasyon karon isip managhigala.
Kahinumduman nga si Pampi kanhi bana ni Jodi, ug niadtong tuig 2024 lang pormal nga na-annul ang ilang kaminyoon. Matod ni Iwa, bisan pa man og wala sila nagsugod sa maayong kabubut-on kaniadto, sayon ra ang ilang transisyon nga mamahimong mag-amigo tungod kay dili siya ang rason sa panagbulag sa duha. Dakong tabang usab ang ilang dako nga gugma alang kang Thirdy, ang anak ni Jodi ug Pampi, diin nagtinabangay silang tulo sa pagpadako niini.
Tungod sa kaayohan sa ilang relasyon, giisip na karon ni Iwa si Jodi isip usa sa iyang pinakasuod nga higala. Gani, bisan sa tuig 2028 pa nakatakda ang kasal human sa eleksyon, sigurado na nga apil si Jodi sa entourage. Sumala pa kay Iwa, nagtiaw-tiaw na sila kaniadto bahin sa gown, ug sa dihang nanyaga o nag-propose si Pampi kaniya, usa si Jodi sa mga unang nakahibalo ug hilabihan ang kalipay niini alang sa ilang duha.
Photo Courtesy: PEP.ph
