Nangayo og permiso sa mga awtoridad sa Estados Unidos ang Verily, usa ka kompanya nga ubos sa Alphabet Inc. (ang ginikanang kompanya sa Google), aron magpagawas og milyon-milyong laki nga lamok. Ubos sa ilang proyekto nga “Debug”, nagtumong kini nga sumpoon ang mga sakit nga gidala sa mga insekto didto sa mga estado sa California ug Florida.
Sumala sa plano, mokabat sa 32 milyon ka laki nga lamok ang pagabuhian sulod sa duha ka tuig aron pakunhuran ang populasyon sa Culex quinquefasciatus o southern house mosquito. Ang maong espisye sa lamok nailang maoy nagdala ug nagpakatap sa mga delikadong sakit sama sa St. Louis encephalitis ug West Nile virus.
Ang maong mga lamok nga gipadako sa laboratoryo gilubngan og bakterya nga gitawag og Wolbachia. Tungod niini, kung makighilawas ang mga artipisyal nga laki nga lamok ngadto sa mga ihalas nga babaeng lamok, moresulta kini sa dili pagkapusa sa mga itlog, butang nga mopaubos sa ilang populasyon sa maong mga dapit.
Gipasalig sa mga eksperto nga luwas ang maong eksperimento tungod kay ang mga laki nga lamok dili mopaak sa tawo ug mokaon lamang og nectar sa bulak. Gikompirma usab sa Centers for Disease Control and Prevention (CDC) nga ang Wolbachia dili makadaot sa tawo ug hayop, ug kini nga pamaagi malampuson na usab nga gigamit sa Singapore, Thailand, ug Mexico batok sa dengue ug Zika virus.
Photo Courtesy: Miphidic
