Padayon nga naghatag og garbo sa nasud ang Team Philippines human maka-angkon og upat ka gold ug usa ka silver medal sa Asian Rowing Beach Sprint Championships nga gipahigayon sa Pattaya, Thailand.
Gipangunahan ni Emman Pillar ang kampanya sa Pilipinas pinaagi sa pag-angkon sa medalya sa Under-16 Coastal Men’s Solo, samtang nakadaog si Matt Jugadora og silver sa Under-19 Coastal Men’s Solo.
Sa katapusang adlaw sa kompetisyon, nadugangan pa ang koleksiyon sa Pilipinas pinaagi sa gold medal nga nakuha nila Ayonna Huerto ug Khayzie Caviltes sa Under-19 Coastal Women’s Double Sculls, ug nila Kyle Olano ug Emman Pillar sa Under-16 Coastal Men’s Double Sculls.
Gihulagway ni Philippine Sports Commission Chairman Patrick Gregorio ang kalampusan isip positibong kalamboan batok sa ubang lig-ong rowing nations sa Asya.
Matod ni Gregorio, ang mga nagdaog nga atleta gikan sa Ternate, Cavite kadaghanan mga anak sa mga mangingisda nga nahimong produkto sa grassroots sports development program sa nasud.
Dugang niya, adunay dakong potensyal sila Pillar ug Jugadora nga mahimong mga umaabot nga Olympians ug magpadayon sa pagdala og dungog sa Pilipinas sa international competition.
Photo Courtesy: REMATE
