Kapin sa 6,000 ka benepisyaryo sa Tulong Panghanapbuhay sa Ating Disadvantaged/Displaced Workers (TUPAD) ang gi-deploy sa Department of Labor and Employment (DOLE) Region 9 ngadto sa mga pampublikong eskwelahan sa Zamboanga Peninsula.
Sumala ni DOLE 9 Regional Director Albert Gutib, ang maong mga benepisyaryo motabang sa pag-ayo sa mga naguba nga classroom, paglimpyo sa campus grounds, ug pagmentinar sa lain-laing pasilidad sa mga eskwelahan isip kabahin sa pag-andam sa pagbukas sa klase alang sa School Year 2026–2027.
Gipasiugda sa DOLE 9 nga ang TUPAD usa ka temporaryong programa nga naghatag og kahigayunan sa trabaho ngadto sa mga disadvantaged ug displaced workers pinaagi sa community-based projects nga nagtabang sa komunidad.
Lakip sa gilauman nga kalihukan mao ang mas paspas nga rehabilitasyon sa mga eskwelahan ug pagpaayo sa kahimtang sa mga pasilidad aron masiguro ang kahapsay ug kaluwasan sa mga estudyante ug magtutudlo sa ilang pagbalik sa klase.
Gilauman sa DOLE 9 ug Department of Education nga pinaagi sa hiniusang paningkamot sa mga TUPAD beneficiaries, magtutudlo, ug boluntaryo, mas mapadali ang pagpangandam sa mga eskwelahan ug masigurong andam kini alang sa bag-ong school year.
