Posibleng dili na makagawas sa prisohan ang mga lider sa notoryosong gang nga MS-13 human gipahibalo sa mga awtoridad sa El Salvador nga mahimo silang mahatagan og silot nga moabot sa liboan ka tuig nga pagkabilanggo tungod sa daghang krimen nga ilang giatubang.
Sa kasamtangan, 485 ka mga miyembro sa MS-13 ang gigukod sa korte alang sa kapin 47,000 ka mga krimen nga gituohang ilang nahimo tali sa 2012 ug 2022. Lakip sa mga kaso ang pagpatay, pagpangikil, ug uban pang seryosong kalapasan sa balaod.
Ang maong grupo giila sa Estados Unidos ug El Salvador isip usa ka teroristang organisasyon. Lakip sa mga akusado ang 22 ka lider sa gang nga nahukman na kaniadto sa ubang mga kaso apan nag-atubang gihapon og bag-ong mga sakdal, lakip na ang pagkalambigit sa pipila sa gituohang 29,000 ka mga pagpatay nga gihimo sa grupo.
Niadtong 2022, gilunsad ni Presidente Nayib Bukele ang kampanya batok sa mga gang pinaagi sa pagdeklara og state of emergency. Tungod niini, kapin 92,000 ka mga suspetsadong miyembro sa gang ang nadakpan sa tibuok nasud, bisan pa nga adunay mga kaso diin ang pipila sa mga nadakpan sa ulahi gideklarang walay sala.
Sumala sa Salvadoran prosecutor’s office, ang mga sentensiyang ipahamtang sa mga lider sa MS-13 mahimong moabot sa liboan ka tuig, nga nagpasabot nga halos wala nay posibilidad nga makagawas pa sila sa prisohan.
Photo Courtesy: ABC News
