Nadakpan ang usa ka 29-anyos nga lalaki nga giila sa kapulisan isip High Value Individual (HVI) sa kampanya batok sa ilegal nga droga atol sa buy-bust operation nga gilusad sa nagkahiusang pwersa sa kapulisan ug mga anti-drug operatives sa Barangay Poblacion sa syudad sa Bislig kagabii, Hunyo 8, 2026.
Ang suspek, nga giilang si alyas “Joe,” ulitawo ug walay permanenteng trabaho, residente sa Purok 12, Mancarugo, Barangay Poblacion, nadakpan atol sa operasyon nga gipahigayon sa mga operatiba sa Bislig City Police Station ubos sa pagpanguna ni PLTCOL Jassen N. Tuario.
Gipahigayon ang operasyon pinaagi sa Drug Buy-Bust Operation ubos sa PDEA Pre-Operation Number ug nakabase sa Target Intelligence Packet (TIP) nga nagmonitor sa kalihokan sa maong suspek.
Nasakmit gikan kaniya ang usa ka sachet nga adunay gituohang shabu nga maoy gipalit sa poseur buyer atol sa operasyon. Dugang pa niini, narekober usab ang tulo ka sachet nga adunay susamang substansiya nga adunay gibanabanang gibug-aton nga usa ka gramo ug kantidad nga mokabat sa P6,800.
Lakip usab sa mga ebidensiyang nakuha ang usa ka P1,000 nga buy-bust money, usa ka itom nga coin purse, ug usa ka walay sulod nga plastik nga sachet.
Karon, anaa na sa kustodiya sa Bislig City Police Station ang suspek samtang giandam ang pagsaka sa kasong paglapas sa Republic Act 9165 o ang Comprehensive Dangerous Drugs Act of 2002 batok kaniya.
Photo courtesy: RBB
