Ipuli na sa GCash ang mas luwas nga In-App One-Time Passwords (OTP) puli sa text-message-based OTP isip kabahin sa kampanya batok sa nagkadaghang online scam ug fraud.
Sumala sa GCash, sugod karong Hunyo 22, 2026, hingpit nang ipatuman ang In-App OTP system diin ang verification code ipadala direkta sulod sa GCash app pinaagi sa push notifications imbis nga pinaagi sa text message.
Matod ni Miguel Geronilla, Chief Information Security Officer sa GCash, tumong sa maong pagbag-o ang pagwagtang sa risgo nga masamok o makawat sa mga scammer ang SMS OTP pinaagi sa phishing ug spoofing schemes.
Dugang pa sa kompanya, mas paspas ug mas sayon usab ang transaksyon tungod kay dili na kinahanglan mobalhin pa sa laing aplikasyon, maghulat og text message, o mano-manong mosulod sa verification code.
Ang maong lakang kabahin sa pagsunod sa mando sa Bangko Sentral ng Pilipinas ubos sa Anti-Financial Account Scamming Act o AFASA, nga nagmando sa tanang financial institutions nga tangtangon ang SMS-based OTP sa dili pa matapos ang Hunyo 2026.
Gihangyo sa GCash ang tanang users nga i-enable ang notifications sa ilang aplikasyon aron malikayan ang problema ug pagkaputol sa ilang mga transaksyon sa umaabot.
