Nagpahimangno ang Provincial Veterinarian’s Office sa Probinsya sa Zamboanga Sibugay sa tanang poultry raisers ug mga tag-iya sa manok nga magpabiling mabinantayon batok sa hulga sa bird flu o avian influenza.
Gibutyag ni Provincial Veterinarian Officer Doctor Efren Davin nga importante nga sundon sa mga mag-uuma ug backyard poultry raisers ang mga biosecurity measures aron malikayan ang posibleng pagkaylap sa sakit.
Gipahimangnoan ang mga tag-iya sa manok nga likayan ang direktang kontak sa ilang mga alaga ngadto sa mga migratory o ihalas nga langgam nga mahimong tinubdan sa virus. Gidasig usab sila nga kanunayng limpyohan ug mag-disinfect sa mga kulungan ug kagamitan sa pag-atiman sa mga manok.
Nagpabilin nga alerto ang Provincial Veterinarian’s Office aron masiguro ang kaluwasan sa industriya sa manokan ug maprotektahan ang panginabuhian sa mga mag-uuma sa probinsya.
