Nagsugod na ang Department of Energy (DOE) sa pagtimbang sa epekto sa kusog nga 7.8-magnitude nga linog nga niigo sa Mindanao Lunes sa buntag, ilabina sa mga kritikal nga pasilidad sa kuryente ug enerhiya sa rehiyon.
Matod sa DOE, nakig-coordinate kini sa mga electric cooperative, distribution utility, ug mga stakeholder sa industriya sa lana aron masuta ang kahimtang sa mga linya sa kuryente, substations, distribution facilities, fuel depots, ug retail stations.
Samtang, gikumpirma sa National Grid Corporation of the Philippines (NGCP) nga adunay mga transmission lines nga naapektuhan sa linog nga nagsuplay og kuryente sa pipila ka bahin sa Davao Region, Maguindanao, Sarangani, South Cotabato, North Cotabato, ug Sultan Kudarat.
Bisan pa niini, gipahibalo sa NGCP nga naibalik na ang serbisyo sa transmission sa Davao del Sur, Davao Occidental, Davao de Oro, ug Davao Oriental alas 8:30 sa buntag, samtang nagpabiling normal ang operasyon sa ubang mga lugar sa Mindanao.
Photo Courtesy: Philippine News Agency
