Arestado ang usa ka 25-anyos nga lalaki atol sa gihimong anti-illegal logging operation sa mga operatiba sa Tandag City Police Station didto sa Purok Malinawon, Barangay San Isidro, Tandag City niadtong Hunyo 6, 2026.
Ang maong operasyon gipangunahan ni PLTCOL Junyd D. Marohom, Officer-in-Charge sa Tandag CPS, isip kabahin sa gipakusog nga kampanya batok sa illegal logging ug sa ilegal nga pagpahimulos sa kahoy nga gikan sa kabukiran.
Giila ang suspetsado nga si alyas “Doydoy,” nga nadakpan samtang nagkarga ug nag-andam og mga sawn Lauan lumber nga ipanghatod unta. Nakumpiska gikan kaniya ang 25 ka piraso sa kahoy nga adunay total volume nga 473 board feet ug gibanabana nga kantidad nga Php14,190.00.
Atol sa operasyon, gihangyo sa kapulisan ang suspetsado nga magpakita og mga legal nga dokumento o permits nga nagapamatuod sa iyang pagpanag-iya ug transportasyon sa maong mga kahoy. Apan napakyas siya sa pagpresentar sa bisan unsang papeles nga ligal.
Tungod niini, giandam na ang kasong paglapas sa Presidential Decree No. 705 o ang Revised Forestry Code of the Philippines nga ipasaka pinaagi sa inquest proceedings sa Office of the City Prosecutor.
Photo courtesy: Tandag City Police Station
