Gitinguha pa sa Department of Trade and Industry (DTI) ang plano nga himuong mandatory ang product certification sa mga solar panel systems aron masiguro ang kalidad ug kaluwasan sa mga produktong gibaligya.
Matod sa DTI, importante kini ilabina karon nga nagkadaghan ang mga Pilipino nga naggamit og solar energy aron mapakunhod ang gasto sa kuryente ug makabaton og mas lig-on nga suplay sa enerhiya.
Ubos sa gisugyot nga regulasyon, sakop sa mandatory certification ang unom ka importanteng solar components lakip na ang solar panels, inverter systems, battery energy storage systems, rapid shutdown devices, battery charge controllers ug PV cables.
Ang maong kamanduan ipatuman lang sa tanang solar products nga gibaligya sa Pilipinas, lokal man o imported. Giklaro usab sa DTI nga ang certification magtutok lamang sa kalidad sa mga produkto ug dili sa instalasyon sa solar systems, nga nagpabiling sakop sa Department of Energy.
Kung mapatuman na ang regulasyon, ang mga solar products nga walay gikinahanglang Philippine certification mahimong dili na tugotan nga ibaligya ug posibleng makumpiska.
Samtang, hatagan og 60 ka adlaw ang mga stakeholders aron makahatag sa ilang komento ug rekomendasyon, ug adunay usa ka tuig nga transition period sa dili pa hingpit nga ipatuman ang bag-ong polisiya.
Photo Courtesy:MANILA BULLETIN
