Subling nagpahinumdom ang Department of Health-Northern Mindanao sa katawhan nga perming manghinlo sa palibot labi na nga nagsugod na ang ting-ulan.
Sumala pa ni Gemma Uy, gikan sa DOH X-Infectious Cluster nga sugdan na sa pagpanghinlo sa palibot, labi na ang pagyabo sa mga container nga mapunduhan og tubig, tungod posible kining pangit-lugan sa lamok nga nagadala og sakit sama sa dengue ug uban pa.
Pahimangno sab niya ngadto sa mga nagapondo og tubig sa mga drum, balde ug uban pang container nga siguruhong aduna kini tabon aron nga dili masudlan og lamok.
Labi pa nga wala may ginapili ang lamok nga pangitlugan, posible silang nangitlog sa hugaw ug hinlo nga tubig. Susihon sab ang mga dapit nga stagnant ang agos sa tubig sama sa kanal, nga pwedeng pangitlugan og lamok.
Dugang ni Uy nga labing mahinungdanon ang kooperasyon ug pagtinabangay sa matag komunidad nga magpakabana sa kahinlo sa palibot aron nga makalikay sa mga sakit.
Kahibaluang, ginasaulog sa bulan sa Hunyo ang Asean Dengue Day aron nga mapataas ang kahimatnong sa mga tao sa sakit nga dengue ug aron sila ma-mobilisa nga mapugngan ang pagsaka sa nahisgutang sakit.
Photo courtesy: DOH X
