Misaka og kapin 11 porsiyento ang kinatibuk-ang assets o kabtangan sa mga bangko sa Pilipinas niadtong Abril, nga miabot sa P30.1 trilyon kumpara sa samang panahon sa miaging tuig, sumala sa datos sa Bangko Sentral ng Pilipinas (BSP).
Lakip sa maong kantidad ang kwarta ug deposito sa ubang bangko, mga pautang, pamuhunan, mga yuta ug kabtangan nga nakuha pinaagi sa foreclosure, ug uban pang assets.
Bisan pa niini, mikunhod og hapit usa ka porsiyento ang total assets sa mga bangko kung ikumpara sa miaging bulan.
Matod ni Jonathan Ravelas, senior adviser sa Reyes Tacandong & Co., ang maong pagkunhod dili angay kabalak-an tungod kay kini usa lamang ka normal nga pagbalanse sa sektor sa bangko human sa kasagarang pagtaas sa katapusan sa unang quarter sa tuig.
Gipasabot niya nga kasagarang mag-adjust ang mga bangko samtang nagbalik sa normal ang liquidity, nagamit ang mga deposito sa gobyerno, ug nag-usab ang market valuations.
Dugang pa niya nga lig-on gihapon ang liquidity sa sektor, padayon ang pagdagayday sa kredito o pautang, ug aktibo ang mga institusyong pinansyal sa pagsuporta sa pagtubo sa ekonomiya.
Sa detalye, miabot sa P17.2 trilyon ang total loan portfolio sa mga bangko, nga mas taas og kapin sa 12 porsiyento kumpara sa miaging tuig. Lakip niini ang interbank lending ug mga short-term placements sa sentral nga bangko.
Samtang, misaka usab og 8 porsiyento ang kantidad sa mga pamuhunan sa sektor sa bangko ngadto sa P8.68 trilyon.
