Gipahamtangan sa China og travel ban ang upat ka miyembro sa parlamento sa New Zealand human sa ilang pagbisita sa Taiwan niadtong Mayo. Sumala sa report, ang upat ka magbabalaod gikan sa nagkalain-laing partidong politikal ug miapil sa usa ka cross-party delegation nga mibisita sa Taiwan.
Gikompirmar sa opisina ni Foreign Minister Winston Peters ang maong travel ban ug giingong nakurat sila sa maong lakang sa China. Gihangyo usab ni Peters ang mga diplomat sa New Zealand nga hisgutan ang maong isyu sa mga opisyal sa China sa Beijing ug Wellington.
Bisan pa niini, gihingusgan sa New Zealand nga ang pagbisita sa mga magbabalaod wala makalapas sa ilang “One China” policy, diin giila sa Wellington ang pag-angkon sa Beijing sa Taiwan. Matod sa tigpamaba sa ministeryo, gawasnon ang mga miyembro sa parlamento sa paghimo sa ilang kaugalingong desisyon may kalabotan sa mga imbitasyon sa pagbiyahe ngadto sa ubang nasud.
Usa sa mga naapektuhan sa travel ban si MP Laura McClure miingon nga ang lakang sa China usa ka pamaagi sa pagpanghadlok sa mga magbabalaod sa New Zealand. Matod niini, usa ka soberanong nasud ang New Zealand ug adunay katungod ang mga miyembro sa parlamento sa pagrepresentar sa ilang mga komunidad ug sa gawasnong pagbiyahe sa tibuok kalibutan.
Sa laing bahin, wala motubag ang embahada sa China sa Wellington sa hangyo sa AFP alang sa ilang komento.
Photo courtesy:DW
