Pagdayeg ang gipaabot sa seasoned singer nga si Klarisse de Guzman ngadto sa batan-ong mang-aawit nga si Mika Salamanca, atol sa malampusong paglusad sa debut album niini nga giulohan og “Mahika” sa SM North Skydome. Gipahayag ni Klarisse nga sukad pa sa unang adlaw, kanunay na siyang nagpaluyo ug nagsuporta sa karera sa iyang higala.
Nag-uban pa ang duha sa entablado alang sa usa ka duet sa sikat nga kanta sa Rivermaya nga “Himala.” Mapasalamaton kaayo si Mika kang Klarisse tungod kay bisan pa man sa ka-busy sa schedule niini, naggahin gayod kini og panahon alang kaniya. Sumala pa ni Klarisse, ang ilang panaghigalaay nagsugod sulod sa balay ni Kuya sa Pinoy Big Brother (PBB) Celebrity Collab Edition, ug mas milig-on pa kini hangtod sa ilang paggawas.
Gisuportahan usab ni Klarisse ang kakugi ni Mika, kinsa hands-on sa paghimo sa maong album nga adunay unom ka tracks. Kahinumduman nga si Mika ang nahidangat nga Big Winner sa maong edisyon sa PBB kauban si Brent Manalo, diin human niini daling mipirma og kontrata si Mika ubos sa Star Music aron pormal nga sugdan ang iyang music career.
Mitambong usab sa maong dakong okasyon ang pipila ka mga higala ni Mika sa wala pa siya mosulod sa PBB sama nilang Benedict Cua, Zeinab Harake, Kyo Quijano, ug Luigi Pacheco, uban ang iyang mga kaubang housemates kaniadto nga silang Will Ashley, Xyriel Manabat, Josh Ford, ug LA Santos.
Photo Courtesy:x.com
