Migula sa pinakabag-ong datos sa Department of Health (DOH) nga miabot ngadto sa 277 ka mga bag-ong kaso sa Human Immunodeficiency Virus (HIV) ang natala sa Rehiyon 12 gikan Enero 1 hangtod Marso 30 ning tuig 2026.
Sumala sa DOH, nagpakita og pagsaka ang maong ihap kung itandi sa miaging quarter, hinungdan nga mas gipahugtan karon sa mga otoridad sa panglawas ang ilang panawagan batok sa paspas nga pagkaylap sa maong impeksyon.
Gumikan niini, nalakip karon ang SOCCSKSARGEN sa mga rehiyon sa tibuok nasod nga adunay labing taas nga ihap sa mga bag-ong natakdan sa HIV sa unang bahin sa tuig.
Sa tibuok nasod, natala ang kinatibuk-ang 4,633 ka mga bag-ong kaso sa HIV sa maong quarter. Sa isla sa Mindanao, nag-una sa listahan ang SOCCSKSARGEN nga adunay 277 ka kaso, diin gisundan usab kini sa Davao Region nga adunay 263 ka kaso.
Tungod niining datus, padayon ang gihimong pagpadasig sa DOH ngadto sa publiko nga magpasuri o magpa-HIV test, magbansay sa luwas nga pagpakigsekso, ug pahimuslan ang mga libreng HIV prevention ug treatment services sa kagamhanan aron hingpit nga mapugngan ang pagkaylap sa maong sakit.
Photo Courtesy: Advin Health Care
