Hingpit na nga nahuman sa National Basketball Association (NBA) ang pagpangandam sa duha ka mga court nga gamiton alang sa dako ug gikahinamang 2026 NBA Finals kung asa highlight sa disenyo sa hardcourt ang Larry O’Brien Trophy.
Gikatakda ang unang krusyal nga panagsangka tali sa New York Knicks ug San Antonio Spurs karong umaabot nga Hunyo 4, 2026, oras dinhi sa Pilipinas, diin ipahigayon ang Game 1 ug Game 2 sa Frost Bank Center—ang homecourt sa Spurs—samtang ang Game 3 ug Game 4 adto usab dulaon sa Madison Square Garden nga balwarte sa Knicks.
Kini ang unang higayon sukad niadtong makasaysayanong 1999 Finals nga mag-atbang pag-usab ang duha ka sikat nga koponan, diin gipildi kaniadto sa Spurs ang New York sulod sa lima ka dula, samtang gihimo usab sa Knicks ang kasaysayan isip labing unang No. 8 seed nga nakaabot sa championship series.
Karong tuiga, mipakita na usab og grabeng gilas ang Knicks human nila gipukan pinaagi sa sweep ang Cleveland Cavaliers sa Eastern Conference Finals.
Sa pikas bahin, wala usab nagpalupig ang San Antonio Spurs human nila gipahagba ang defending champion nga Oklahoma City Thunder sa usa ka sikit ug kulbahinam nga Game 7 sa Western Conference Finals.
Photo Courtesy: NBA
