Gikumpirma sa COMELEC Davao De Oro, nga magpadayon ang Barangay ug Sangguniang Kabataan Elections karong umaabot November 2, 2026.
Atol sa pakighinabi sa Juander Radyo News Team ning bag-uhay lang, gikumpirma ni Atty. Krisna Samantha T. Caballero- Provincial Election Supervisor sa Davao De Oro nga magpadayon ang Barangay ug Sangguniang Kabataan (SK) Elections tungod kay wala’y balaod nga nagmando sa pagsuspinde, pagkansela niini.
Matod niya, 100 porsyento nga madayon ang eleksyon samtang walay legal nga babag nga makapahunong sa proseso. Nahuman na usab ang voter’s registration niadtong Mayo 18 ug gipahigayon ang Election Registration Board hearing alang sa pag-apruba sa mga aplikasyon sa mga bag-ong rehistradong botante.
Gipadayag usab ni Caballero nga nagpadayon ang COMELEC sa pagsunod sa election calendar, paghimo sa Project of Precincts ug clustering sa mga botante, ingon man sa pag-inspeksyon sa mga voting centers aron masiguro ang kahandam ug kaluwasan sa adlaw sa piniliay.
Ang maong pahayag nagpakita nga organisado ug tuloy-tuloy ang mga preparasyon sa COMELEC alang sa Barangay ug SK Elections.
Pinaagi sa paghuman sa mga kinahanglanong proseso ug inspeksyon, gitinguha sa komisyon nga masiguro ang hapsay, luwas, ug kasaligan nga pagpahigayon sa eleksyon.
