Gipasidunggan ang kakugi sa mga mag-uuma ug ang talagsaong abilidad sa mga lokal nga barista sa mabulukong pagselyo sa SEA Green Coffee Competition Philippines National Round uban sa Bukidnon Coffee Festival atol sa tulo ka adlaw nga kalihokan nga nagsugod niadtong Mayo 29, ug natapos kagahapon, Mayo 31, 2026, didto sa Roadhouse, Valencia City.
Gawas sa paghatag og pasidungog sa world-class nga kalidad sa green coffee beans sa mga mag-uuma sa unang adlaw pa lang, usa sa mga giatangan sa publiko mao ang kulbahinam nga Latte Art Throwdown nga nagdala sa temang “Roots and Creations.”
Sa maong kompetisyon opisyal nabutang sa listahan sa Top 6 Winners nga nagpakita sa ilang grabeng talento sa pagdesinyo ibabaw sa kape: CHAMPION: Jesleh Clark Ellorango 2nd Place: Jun’Jun Besande 3rd Place: Cj Boquiren 4th Place: Roger Cosgafa 5th Place: Roessan Valmores Cua 6th Place: John Mark Tajuda
Kini nga kalihokan nagpamatuod dili lang sa kaabunda sa de-kalidad nga kape ang Bukidnon, kondili lakip sa mga world-class nga mga talento sa pag-preparar niini nga andam makigtigi sa tibuok Southeast Asia
Gikabutyag ni Mikhaela Dueñas – Country Selection Partner SEA Green nga usa kini ka dakong pribilehiyo alang sa lalawigan tungod kay duna kini kapin sa usa ka gatos (100) ka entries nga gikan pa sa nagkadaiyang bahin sa Mindanao, Luzon, ug Visayas diin ang midaug ipadala ngadto sa nasod sa Vietnam aron makigkompetensiya sa uban pang mga de-kalidad nga kape sa Southeast Asia.
Personal nga nitambong sa kalihukan si Governor Rogelio Neil P. Roque, diin iyang gipasiugda ang kamahinungdanon sa industriya sa kape dili lang sa ekonomiya kondili lakip na sa turismo sa tibuok lalawigan.
Photo Courtesy: LGU Bukidnon
