Nadakpan ang usa ka gidudahang drug personality atol sa buy-bust operation nga gihimo sa Cantilan Municipal Police Station (MPS) kauban ang Philippine Drug Enforcement Agency (PDEA) niadtong nakalabay nga adlaw alas 4:00 sa hapon sa Purok 5, Embarcadero, Barangay Linintian, Cantilan, Surigao del Sur.
Ang operasyon gipangunahan ni PSMS Raymond C. Gorrero ubos sa pagdumala ni PMAJ Joevarie S. Arreza, Assistant Chief of Police (ACOP), kauban ang mga operatiba sa PDEA Region 13.
Giila sa kapulisan ang nadakpan nga si alyas “Loloy,” 48-anyos, minyo, mekaniko, ug residente sa Purok 2, Barangay San Pedro, Cantilan.
Gihimo ang operasyon uban sa presensya sa mga saksi gikan sa media ug mga opisyal sa barangay lakip sila si Germanalex P. Hilario, Barangay Captain Arsenio D. Creman, ug Barangay Kagawad Eladio Cortes Jr. sa Barangay Linintian.
Narekober gikan sa suspetsado ang mosunod:
• Usa ka sachet nga adunay gidudahang shabu nga may gibug-aton nga 0.5 gramos ug balor nga Php 3,400.00
• Usa pa ka sachet nga adunay gidudahang shabu nga may gibug-aton nga 1.3 gramos ug balor nga Php 8,840.00
• Upat ka sachet nga adunay gidudahang residue sa shabu
Sumala sa kapulisan, gipahibalo ang suspetsado sa iyang Constitutional Rights ug Miranda Doctrine sa pinulongang iyang nasabtan.
Ang tanang nakumpiskang ebidensya gi-markahan ug gi-inventory ug karon anaa na sa kustodiya sa Cantilan MPS alang sa hustong dokumentasyon ug disposisyon.
Giandam na usab ang kasong paglapas sa Sections 5, 11, ug 15 sa Republic Act 9165 o Comprehensive Dangerous Drugs Act of 2002 batok sa suspetsado.
Photo courtesy: Cantilan MPS
