Gipasabot sa Land Transportation Office o LTO Davao de Oro nga gitarget nila nga mahuman sulod sa pito hangtod onse ka adlaw ang pagproseso sa rehistro sa mga bag-ong sakyanan, lakip na ang pagpagawas sa plaka, Official Receipt (OR), ug Certificate of Registration (CR), sukad sa petsa sa pagbaligya sa unit.
Sumala sa memorandum sa LTO, gibahin sa nagkalain-laing lakang ang proseso aron mapaspasan ang serbisyo ug malikayan ang dugay nga paghulat sa mga motorista sa ilang dokumento.
Atol sa Ronda Opisina sa Juander Radyo Nabunturan News Team, gipasabot ni Admin Officer III Vernon Canda, sa LTO Davao de Oro, nga ang mga dokumento gikan sa mga dealer maoy ilang ginaproseso sa ilang buhatan aron masiguro nga kompleto ug hapsay ang pagrehistro sa mga sakyanan.
Dugang pa ni Canda, aduna gihapoy mga reklamo nga madawat ang ilang opisina kabahin sa dugay nga pag-release sa rehistro. Apan iyang gipasabot nga importante nga kumpleto ang mga papeles nga ipasa sa LTO aron mapadali ang proseso ug malikayan ang kalangan sa pagpagawas sa mga dokumento
Padayon usab ang LTO Davao de Oro, sa pagpaayo sa ilang serbisyo aron mas mapaspas ug mas episyente ang paghatag og serbisyo ngadto sa publiko.
