Naglunsand og higpit nga monitoring ang Department of Agriculture (DA-ZAMPEN) uban sa lokal nga kagamhanan sa Pagadian aron maseguro ang hapsay ug matinud-anong pagpatuman sa Executive Order No. 118 nga nagtakda og ₱50.00 kada kilo nga price cap alang sa 5% Broken Imported Rice.
Ang monitoring gihimo sa Agora Public Market sa Pagadian ubos sa pagpanguna ni Regional Executive Director Vener L. Dilig, kauban si City Agriculturist Engr. Ramon M. Rodrigo Jr., CEED Department Head Eamon B. Siyluy, Market Supervisor Marlon Luzon, ug mga representante gikan sa DTI, DILG ug Sangguniang Panlungsod.
Sumala sa mga otoridad, tumong sa maong lakang nga mapabiling abot-kaya ang presyo sa bugas alang sa matag pamilyang Pagadianon ug mapugngan ang sobra ug dili patas nga pagsaka sa presyo sa bugas sa merkado.
Lakip sa mga imported rice brands nga sakop sa ₱50 kada kilo nga price cap mao ang Sweet Hasmin, Princess Bea, Princess Hasmin, Planters Products Rice, Princess Mia, Jasmine Alas, Maria Jasmin, Sweet Rice, Prince Kylo, Blue Harvest, Sweet Yummy Rice ug Star Jasmine Rice.
Gipahinumdoman usab ang mga negosyante nga sundon ang color coding sa price tags diin puti ang kolor alang sa lokal nga bugas samtang kolor blue alang sa imported nga bugas aron mas sayon mailhan sa mga konsumidor ang mapalit nga bugas.
Photo Courtesy: City Agriculture Office – Pagadian
