Posibleng mogamit sa imported soybean meal gikan sa United States ang mga feed manufacturers sa Pilipinas tungod sa pagsaka sa presyo sa fuel ug fertilizer nga nakaapekto sa global supply.
Sumala sa US Soybean Export Council (USSEC), posibleng mosaka ang demand sa soybean meal gikan sa Amerika tungod sa kakulang sa supply nga may kalabotan sa tensyon sa Middle East.
Matod ni USSEC executive director for East Asia Carlos Salinas, mahimong mosalig ang Pilipinas sa US soybean meal aron masuportahan ang lokal nga industriya sa animal ug aquaculture feeds.
Gibutyag usab sa USSEC nga misaka na sa 16.8 porsyento ang wholesale price sa soybean meal, gikan sa 25 pesos ngadto sa kapin 30 pesos matag kilo base sa monitoring sa Bureau of Animal Industry.
Gipasidan-an usab nga posible pang mosamot ang problema sa supply sa ubang feed ingredients ug synthetic amino acids tungod sa pagsaka sa gasto sa enerhiya, logistics ug produksyon.
Matud pa ni Salinas, mas naglisod karon ang Europe sa energy supply hinungdan mas daghang nasud ang mahimong moangkat na lamang og soybean meal gikan sa Amerika ug South America.
Photo Courtesy: Triplepundit
