Gikatakdang magpahigayon og libreng Theoretical Driving Course (TDC) ang Land Transportation Office (LTO) Pagadian karong Mayo 30 hangtod 31, 2026 isip kabahin sa pagsaulog sa Road Safety Month 2026.
Sumala sa LTO Pagadian District Office, kabahin kini sa ilang padayong kampanya aron mapalig-on ang kahibalo sa katawhan kabahin sa road safety ug responsableng pagmaneho.
Ang kalihokan gihimo subay sa LTO Memorandum No. MVL-2026-133 ug nagsuporta sa tema sa Department of Transportation nga “Sama-Sama Patungo sa Mas Ligtas na Kalsada.”
Tumong sa libreng TDC nga matudluan ang mga gustong mahimong drayber kabahin sa balaod sa trapiko, defensive driving, hustong pamatasan sa dalan, ug disiplina isip motorista.
Gituohan sa maong buhatan nga pinaagi niini, mas mapamenosan ang mga aksidente sa kadalanan ug mas mapalambo ang kaluwasan sa mga biyahero.
Gihatagan usab og prayoridad ang mga nakapa-rehistro daan atol sa Labor Day One-Stop-Shop Services sa Robinsons Pagadian niadtong Mayo 1, 2026 ug sa Grand EODB Fair nga gihimo sa Pavilion Hall, Dao niadtong Mayo 16, 2026.
Giawhag sa LTO Pagadian ang tanang aspiring drivers nga moapil sa maong libre nga seminar aron mahimong responsable ug disiplinadong kaabag sa pagmintinar sa luwas nga kadalanan alang sa tanan.
Photo Courtesy: LTO Pagadian City District Office
