Arestado ang usa ka 65-anyos nga babaye, human gikaingong nanigbas sa iyang kaugalingong anak nga nahitabo sa may Purok 3, Barangay Bubual, San Pablo, Zamboanga del Sur, mga alas 6:30 sa gabii niadtong Mayo 26, 2026.
Base sa imbestigasyon sa San Pablo Municipal Police Station, ang biktima nga usa ka 31-anyos nga mag-uuma ug ang suspek nga iyang inahan gikan pa sa usa ka birthday party sa silingan diin parehong nakainom sa ilimnong makahubog.
Apan, pag-abot sa ilang balay, naglalis ang duha hangtod nga giingong gitigbas sa inahan ang biktima gamit ang usa ka sanggot.
Nasamdan ang biktima sa wala nga bahin sa iyang nawong ug gidala dayon sa Rural Health Unit alang sa medikal nga atensyon.
Naaresto usab dayon sa mga merespondeng pulis ang suspetsado ug narekober usab ang gigamit nga hinagiban.
Ang suspetsado sa karon anaa na sa kustodiya sa San Pablo MPS, samtang giandam ang hustong kaso nga ipasaka batok kaniya.
Photo Courtesy: ZSPPO_PRO9
