Duha ka mga indibidwal ang patay atol sa nahitabong pagpamusil sulod sa mosque sa may Purok Malipayon, Barangay Upper Sang-an, Labangan, Zamboanga del Sur, gabie sa Mayo 26, 2026.
Sa inisyal nga imbestigasyon sa kapulisan, upat ka wala mailang indibidwal nga may dalang short ug long firearms sakay sa usa ka black Toyota Vios ang kalit lang namusil ngadto sa mga biktima.
Daling gidala sa usa sa mga tambalanan sa syudad sa Pagadian ang mga biktima alang sa dinaliang pagtambal apan walay swerte nga nakabsan gihapon kini sa hinulamang kinabuhi.
Samtang naghimo usab dayon ug follow-up operations ang kapulisan alang sa posibleng pag-ila ug pagdakop sa mga suspetsado nga misibat ra usab dayon human sa hitabo.
Giawhag usab sa kapulisan ang publiko nga makigkoordinar sa pinakaduol nga police station alang sa daling pagsulbad sa kaso.
Hugot usab nga gikondena sa Zamboanga del Sur Police Provincial Office (ZSPPO) ang bayolenteng lihok sa pipila ka mga indibidwal diin ilang gipasalig ang mas lawom nga imbestigasyon aron mapapanubag ang mga suspetsado.
Photo Courtesy: ZSPPO PRO-9
