Gipahibalo sa Tagum Water District (TWD) nga mosaka og 15 porsiyento ang water rate alang sa ilang mga konsumante karong bulan sa Hunyo 2026, ug makita kini sa billing sa Hulyo 2026.
Sa pakighinabi ni TWD General Manager Dr. Marie Jane A. Clavero, Ph.d. ug Commercial Services Department Manager Engr. Richard L. Emotin, atol sa pakighinabi sa Juander Radyo Tagum News Team, nga ang bag-ong water rate adjustment giaprobahan sa Local Water Utilities Administration (LWUA) pinaagi sa LWUA Board of Trustees Resolution No. 28, Series of 2026.
Gipasabot usab sa water district nga ang pagtaas may kalabotan sa franchise tax nga gipahamtang sa Bureau of Internal Revenue (BIR) ubos sa Revenue Memorandum Circular No. 63-2003 ug Republic Act No. 10026.
Base sa LWUA Board Resolution No. 285, Series of 2004, ang franchise tax katumbas sa duha ka porsyento (2%) sa basic water bill sa konsumante ug ipatuman isip “pass-on charge.”
Tungod niini, ang maong bayranan ilahi og pakita isip usa ka item sa billing statement sa mga konsumante.
Nag-awhag ang Tagum Water District sa publiko nga magmatngon sa ilang umaabot nga billing ug makigkontak sa ilang opisina alang sa dugang pangutana kabahin sa bag-ong rate adjustment.
