Naghatag ug kabalaka sa mga ginikanan sa Paris, France ang sunod-sunod nga mga alegasyon sa pang-abuso sa mga bata sa eskwelahan, ilabi na sa mga school assistants nga nag-atiman sa mga bata human sa klase.
Usa ka school assistant karon ang nag-atubang og kaso sa korte sa Paris tungod sa alegasyon nga gibastos niya ang mga bata sa eskwelahan. Dugang pa niini, hapit 100 ka daycare centers ug schools sa Paris ang giimbestigahan tungod sa parehas nga reklamo sama sa inappropriate ug agresibo nga batasan sa mga staff.
Tungod sa isyu, daghang ginikanan ang nabalaka ug nagprotesta, nga nag-awhag sa gobyerno nga protektahan ang mga bata ug siguruhon ang kaluwasan sa mga eskwelahan. Giingon sa uban nga kulang ang pag-imbestiga sa unang mga reklamo ug wala kini girespondehi dayon sa awtoridad.
Ang mga school assistants, nga nag-atiman sa mga bata human klase ug sa mga activities, giingon nga kulang og training ug ubos og sweldo, ug usahay dali ra ma-hire bisan basic ra ang kwalipikasyon. Tungod sa eskandalo, ang Paris city government nagplano nga palig-onon ang recruitment, training, ug monitoring, ug paspasan ang pagsuspende sa mga staff nga adunay reklamo.
Samtang nagpadayon ang imbestigasyon, nagkagrabe ang kahadlok sa mga ginikanan ug nagpadayon ang debate kung giunsa pab-atiman ang mga bata ug paghan-ay sa sistema sa eskwelahan sa Paris, France.
Photo Courtesy: BBC
