Mas daghang electric vehicles (EVs) ang gilauman nga makit-an sa mga kadalanan sa Pilipinas pag-abot sa tuig 2035, human gipakita sa bag-ong taho sa International Energy Agency (IEA) nga mahimong mokabat sa 45 porsyento sa total vehicle sales ang EV market kung mapalig-on pa sa gobyerno ang mga polisiya alang sa maong sektor.
Base sa Global Electric Vehicle Outlook 2026 sa IEA, ang tax breaks nga gihatag sa imported EVs sa Pilipinas gilauman nga makatabang pag-ayo sa pagdasig sa merkado sa umaabot nga mga tuig.
Gipasabot usab sa taho nga magpadayon ang dominasyon sa mga Chinese EV manufacturers tungod kay ang tariff exemption alang sa imported EVs magpadayon hangtod sa 2028.
Ang “Stated Policies” scenario sa report nagtuki sa epekto sa mas halapad nga mga polisiya, lakip na ang mga kasamtangang programa sa gobyerno ug mga proposed measures nga nagpakita sa direksyon sa EV sector sa umaabot.
Sa tuig 2025, mikabat sa 10 porsyento ang bahin sa EVs sa merkado sa Pilipinas.
Target sa gobyerno nga mokabat sa labing menos katunga sa mga sakyanan sa nasud ang electric vehicles pag-abot sa 2040.
Ubos sa administrasyon ni Pres. Ferdinand Marcos Jr., gimandato ang mga ahensya sa gobyerno nga unahon ang suporta sa paggamit sa EVs. Una nang gipamahayag ni Marcos nga 10 porsyento sa government fleet kinahanglan mahimong electric vehicles.
Photo courtesy: autodeal.com
