Nagtagana ang Philippine Sports Commission (PSC) og P10 million nga cash incentives alang sa mga medalists sa 66th Palarong Pambansa nga gihimo sa Prosperidad, Agusan del Sur. Una kini nga higayon sa kasaysayan sa Palarong Pambansa nga adunay cash incentives alang sa mga mananaog sa regular sports ug para games.
Nahisubay usab kini sa direktiba ni Presidente Bongbong Marcos aron mapalig-on ang grassroots sports program sa nasud. Ilawom sa programa, makadawat P5,000 ang gold medalists, P3,000 sa silver medalists, ug duha ka libo alang sa bronze medalists.
Matod pa kang Patrick Gregorio, tumong sa programa nga makatabang sa ensayo ug gastohan sa mga estudyante-atleta ug sa ilang pamilya.
Gipasiugda usab sa PSC nga dili lamang pinansyal nga tabang ang ilang gitanyag kondili usa usab ka paagi aron ipakita ang suporta sa gobyerno alang sa kabataang atleta sa ilang sports career.
Gitabangan usab sa Philippine Amusement and Gaming Corporation (PAGCOR) ang programa aron masiguro nga mahatag ang P10,000,000.00 nga pondo ngadto sa mga medalists sa Palarong Pambansa.
Photo Courtesy: Remate
