Nagtinabangay karon ang Department of Energy (DOE) ug Department of Agriculture (DA) aron masusi ang posibilidad sa paggamit sa lokal nga suplay sa uling o coal isip kabahin sa paghimo og abono sa nasud.
Tumong niini nga mapalig-on ang produksyon sa pataba ug masiguro ang igo nga pagkaon alang sa mga Pilipino. Atol sa ilang coordination meeting, gihisgutan ang posibilidad sa pagtukod og pasilidad nga makahimo og urea gikan sa coal. Gisusi usab nila kung asa nga mga lugar ang angay pagatukoran niini ug unsang klase sa coal ang mahimong magamit sa maong proyekto.
Sumala sa DOE, bisan ang ubos og kalidad nga coal mahimong mapuslan aron mapadayon ang suplay sa abono ug makunhuran ang pagsalig sa imported nga pataba gikan sa ubang nasud.
Gipadayag sa DOE nga padayon silang mosuporta sa mga programa sa gobyerno nga nagpalambo sa paggamit sa lokal nga enerhiya ug natural nga kahinguhaan.
Dugang nila, dako kining tabang sa pagpalig-on sa food security sa nasud, paghatag og trabaho sa mga Pilipino, ug pagsuporta sa lokal nga industriya.
Photo Courtesy : DOE/DA
