Nagpabiling naka-full alert status ang Police Regional Office 13 aron masiguro ang kalinaw ug seguridad sa nagpadayong Palarong Pambansa 2026 sa Agusan del Sur nga opisyal nga nagsugod niadtong Mayo 24.
Gilauman nga mokabat sa 16 mil ka mga delegado gikan sa 18 ka rehiyon sa tibuok nasod ang mitambong sa maong nasudnong sporting event.
Aron masiguro ang “360-degree security coverage,” mokabat sa 2,316 ka mga personnel sa Philippine National Police gikan sa nagkalain-laing operational units ang gipakatap sa nagkalain-laing lugar para sa billet ug venue security, clearing operations, traffic management, checkpoints, mobile ug foot patrols, Tourist Assistance Desk ug public safety services.
Dugang pa niini, adunay 355 ka personnel gikan sa ubang ahensya nga katambayayong sa seguridad lakip ang Armed Forces of the Philippines, Bureau of Fire Protection, lokal nga panggamhanan, Local Disaster Risk Reduction and Management Offices ug uban pang force multipliers. Aduna usab kapin 990 ka volunteers nga motabang sa kahapsay ug seguridad sa maong kalihukan.
Nagdeploy usab ang PRO13 og 111 ka mobility assets lakip ang SWAT ug EOD-K9 units, samtang 55 ka Police Assistance Desks ang gipahimutang sa mga strategic areas.
Matud ni PRO13 Regional Director Marcial Mariano Magistrado IV, paningkamotan sa kapulisan nga masiguro nga ang matag atleta, delegado ug bisita makasinati og malinawon, luwas ug malipayon nga Palarong Pambansa dinhi sa rehiyon sa Caraga.
Photo courtesy: PRO-13
