Gipalig-on pa sa Probinsya sa Surigao del Sur ang ilang serbisyo sa panglawas ug emerhensya pinaagi sa pagturn-over sa unom ka bag-ong ambulansya nga gipondohan ubos sa Local Government Support Fund–Financial Assistance to Local Government Units (LGSF-FALGU).
Kabahin kini sa programa sa “Bagong Pilipinas” nga gisulong sa administrasyon ni President Ferdinand Marcos Jr. aron mapaduol sa katawhan ang importanteng serbisyo sa gobyerno, labi na sa mga lugar nga lisod maabot ug kulang sa medikal nga serbisyo.
Ang mga bag-ong ambulansya gipanghatag ngadto sa nagkalainlaing ospital nga gipalihok sa probinsya lakip ang Lingig Community Hospital, Bislig District Hospital, Marihatag District Hospital, San Miguel Community Hospital, Cortes Municipal Hospital, ug Madrid District Hospital.
Matod ni Surigao del Sur Acting Governor Manuel O. Alameda, dako kini og tabang aron mas paspas ug episyente ang paghatag og serbisyong medikal ngadto sa mga Surigaonon, ilabi na sa mga nagpuyo sa layo ug bukirang lugar diin importante ang dali nga responde sa emerhensya.
Pinaagi sa pagdeploy sa unom ka ambulansya, gilauman nga mas mapaspas ang responde sa emerhensya, mas luwas ang pagdala sa mga pasyente, ug mas mapalapdan ang access sa life-saving medical services labi na sa mga kabus ug layo nga komunidad sa Surigao del Sur.
Photo courtesy: PGO
