LIBRE OG CONFIDENTIAL NGA HIV TESTING GIPASIUGDAHAN SA CHO-MALAYBALAY, ARON BATUKAN ANG HIV STIGMA

Gipahinumdoman sa City Health Office Malaybalay ang publiko nga bisan walay tambal ang Human Immunodeficiency Virus (HIV), adunay dakong paglaum alang sa mga positibo niini kon masayong matestingan ug matambalan. Tungod niini, padayon nga nag-awhag ang opisina sa katawhan nga magpa-test aron malikayan ang mas grabeng epekto sa sakit ug mapugngan ang dugang nga pagkatakod.

Sumala sa CHO Malaybalay, libre ug kompidensyal ang ilang HIV testing services nga mahimong maavail sa ilang opisina. Giingon usab nila nga importante ang hustong impormasyon kabahin sa HIV aron mapapas ang kahadlok, diskriminasyon, ug stigma batok sa mga adunay maong sakit.

Gipasabot sa Health Office nga pinaagi sa sayong pagpa-test ug pagtambal, posible nga mabuhi nga normal ug himsog ang usa ka HIV-positive individual.

Samtang nagpadayon ang kampanya batok sa HIV, nanawagan ang City Health Office Malaybalay sa tanan nga suportahan ang paningkamot sa gobyerno aron mapalambo ang kahibalo sa komunidad ug mahunong ang stigma batok sa HIV pinaagi sa hustong edukasyon, pagtinabangay, ug pagrespeto sa matag individual

Photo Courtesy: Malaybalay City Health Office