Gipanawagan karon sa hawanan sa konseho sa dakbayan sa Cagayan de Oro nga atimanon ang waste treatment facility sa Pagalungan Sanitary Landfill aron nga magamit kini sa pagproseso og basura labi na ang medical kon hazardous waste.
Sa gilapag nga report ni Konsehal Roger Abaday, atol sa regular nga sesyon kagahapong adlawa, aduna nay nagtunhay nga hazardous and medical waste treatment facility sa Pagalungan apan wala pa kini naga-operate sa kasamtangan tungod sa mga kakuli-an.
Sa dugang datus ni Konsehal Abaday, 14, 000-kilogram nga medical waste ang ginaproduce sa nagkadaiyang pampubliko ug pribadong ospital, medical clinic ug laboratoryo sa dakbayan sulod lamang sa usa ka adlaw.
Tungod kay walay kaugalingong treatment facility ang syudad, kini nga mga hazardous waste, kinahanglan pang ibiyahe ngadto sa General Santos City. Alang sa konsehal, dako kining risgo dili lang sa kinaiyahan apan lakip na hulga sab kini sa panglawas sa publiko.
Panawagan karon ni Konsehal Abaday nga aksyunan kini sa hingtungdang komitiba lakip na City Health, Department of Health ug uban pang lambigit nga buhatan.
Photo courtesy: Cagayan de Oro City Council
