Misaka ang kantidad sa bato sa apdo sa baka o “cow gallstones” hangtod nga nalabwan pa niini ang presyo sa bulawan sa China tungod sa taas nga demand alang sa traditional medicine.
Ang maong bato sa apdo, nga nailhan sa tawag nga Niu Huang, gigamit sa traditional Chinese medicine isip sangkap sa tambal alang sa mga sakit sama sa stroke, hypertension, ug uban pang cardiovascular diseases.
Base sa mga taho, misaka ang presyo niini ngadto sa kapin $5,800 kada ounce niadtong 2025 tungod sa kakulang sa supply ug padayon nga panginahanglan gikan sa mainland China ug Hong Kong.
Kasagaran mabuo ang gallstones sa mga tigulang nga baka, apan sumala sa mga taho, mas gipili sa daghang slaughterhouses nga ihawon ang mga baka samtang bata pa aron mas maayo ang kalidad sa karne ug mas paspas ang produksiyon. Tungod niini, nihit ang supply sa maong commodity.
Tungod sa dako nga kantidad niini, mitumaw usab ang ilegal nga baligya ug smuggling sa mga nasud sama sa Brazil, Australia, ug United States. Sa São Paulo, adunay mga taho nga armado nga mga grupo ang nangawat og gallstones gikan sa mga baka.
Aron matubag ang kakulang sa supply, nakamugna usab ang mga Chinese researchers og synthetic o lab-grown nga alternatibo nga giingong makasundog sa epekto sa natural nga gallstones.
Samtang niini, adunay mga taho gikan sa Russia nga bisan ang bato sa apdo sa tawo adunay demand usab sa merkado sa China, diin ang usa ka piraso mahimong mabaligya depende sa gidak-on ug kalidad niini
Photo Courtesy: Oddity Central/Shen clinic
