Gipagawas na sa Department of Budget and Management (DBM) ang 81.3 porsyento o P5.523 trilyon gikan sa P6.793-trillion nga 2026 national budget hangtod sa katapusan sa Abril. Bisan pa niini, mas hinay ang maong dagan itandi sa 89.5 porsyento sa miaging tuig, diin nagpabilin pa nga P1.269 trilyon ang wala pa ma-disburse. Ang paghinay gilauman nga epekto sa nahitabong iskandalo sa korapsyon sa flood control sa miaging tuig, hinungdan nga gipahamtang ang mas estrikto nga mga rekisitos sa pag-bidding ug pag-validate sa mga proyekto.
Tungod niini, ang Department of Public Works and Highways (DPWH) nakadawat pa lang og 20.8 porsyento o P110.1 bilyon gikan sa ilang P530.1-billion nga kinatibuk-ang pundo aron tapuson ang mga carryover projects. Bisan pa man, misaka kini gikan sa 12.1 porsyento nga natanggong sukad niadtong Enero human nakuha sa maong ahensya ang kinadak-ang gahong nga P72.1 bilyon niaging Abril. Sa kinatibuk-an sa gobyerno, ang automatic appropriations ang adunay labing taas nga release rate sa 89.6 porsyento, samtang ang special-purpose funds ang labing hinay nga anaa lang sa 52.4 porsyento.
Sa bulan lang sa Abril, nikabat ngadto sa P361.8 bilyon ang kinatibuk-ang pundo nga gipagawas sa DBM aron palambuon ang ekonomiya sa nasud karong ikaduhang kwarter. Gawas sa DPWH, ang uban pang mga nag-unang ahensya nga nakadawat og allotment niaging bulan mao ang PhilHealth (P60 bilyon), DSWD (P43.2 bilyon), NIA (P41 bilyon), Bureau of the Treasury (P24.7 bilyon), PNP (P23.3 bilyon), DepEd (P23.3 bilyon), Department of Agriculture (P17.2 bilyon), ug mga lokal nga kagamhanan o LGU (P5 bilyon).
Photo Courtesy: Inquirer.net
